DUELO DE IGUAIS PARA O FILIAL

- O Alto do Vento visita o Agustín Mourís (20:30) 
- Falamos con Diego Pérez na previa do encontro. 

Diego Pérez en uno de los encuentros disputados esta temporada

Despois da dura derrota encaixada na cancha do líder, o Noia Portus Apostoli regresa ao seu pavillón co obxectivo de volver a sumar. O rival que tentará impedilo é un vello coñecido da escadra noiesa, o Alto do Vento FS. Os santiagueses competiron o curso pasado xunto ao noso filial na Primeira Galicia – A Coruña, protagonizando nos seus choques dous emocionantes partidos, nos que os brancos se impuxeron e que significaron seis puntos moi importantes para a posterior conquista do título. 

Porén, hoxe a realidade de ambos equipos é ben distinta. O ascenso a unha nova categoría adoita ser complicado, e máis nas primeiras xornadas, nas que os conxuntos aínda se atopan nun proceso de adaptación a novos rivais e novos horizontes. Por iso, dous equipos que hai doce meses se situaban na zona noble da súa Liga, hoxe ven máis cerca o descenso que as posicións punteiras. Alto do Vento e Noia Portus Apostoli comparten o mesmo número de vitorias, empates, derrotas e, polo tanto, de puntos, con sete, mais a diferenza de goles permite aos composteláns situarse undécimos, tres postos por riba dos noieses. 

A pesar dos irregulares resultados colleitados polo filial, Diego Pérez, xogador co que falamos esta semana, pensa que “algúns destes non reflexan o xogo que estamos a desenvolver, tanto para ben como para mal. Estamos adaptándonos á categoría e temos que entender que non todo sae como un quere e centrarnos en mellorar”. Sobre o último partido, Diego afirma que “foi un partido difícil de asumir, perder nunca senta ben e menos de maneira tan abultada”, pero prefire centrarse no positivo, “este partido ten que servirnos para facernos máis equipo, nas boas está todo o mundo, pero en situacións como está é como se fai un equipo máis forte, e creo que o estamos sendo”. 

O Alto do Vento é o primeiro dunha serie de equipos situados na zona media-baixa da táboa ao que se enfrontará o Noia Portus Apostoli B, mais Diego non ve ningunha facilidade ou dificultade neste aspecto, “non me gusta clasificar equipos segundo a súa posición na táboa”, botando man do exemplo do seu propio equipo o curso pasado, “as posicións cambian moi rápido, claro exemplo a nosa situación nas primeiras xornadas o ano pasado, e ao final gañamos a Liga”, por iso conclúe que “temos que xogar partido a partido sen subestimar a ninguén, e sen creernos menos que ninguén tampouco”. 

Sobre a cita desta fin de semana, Diego mostra a súa ilusión porque chegue a hora do encontro, “é un partido dos que gusta xogar”. Do rival destaca que “é un equipo con moito un para un”, o que provocará que “temos que estar dende o minuto un metidos e unidos todos xuntos para sacar o partido adiante”. O envite desputarase en Noia, onde o número trece do filial cre que “temos que facer un fortín para que se escapen os menos puntos posibles”, pero sen entregarlle excesiva importancia ao feito de xogar como locais, “non creo que xogar na casa resulte un factor chave”. 

Ata o de agora e dende a pretemporada Diego estivo sendo un habitual nos adestramentos do primeiro equipo, algo que el cre que “inflúe no rendemento, xa que entrenas máis días, factor que é moi importante para seguir mellorando”, sobre todo nun ano no que, afirma, “non comecei da mellor forma”. Dito isto, Diego centra os obxectivos grupais deste curso como “un ano de adaptación e mellora do equipo nesta categoría, para o ano que vén abordalo con máis experiencia, moi importante nesta Liga”, e a nivel persoal “mellorar adestramento tras adestramento para axudar ao equipo e tamén para estar preparado por se algún día é necesario ir adestrar ou xogar co primeiro equipo”. 

Co adestramento deste xoves por realizar, Nikima contará, con respecto ao último encontro, coas voltas á dispoñibilidade de Avilés e Manu García, dous homes que poderían entrar na lista de convocados para recibir ao Alto do Vento este sábado 10 de novembro ás 20:30, na xornada oito da Preferente Autonómica – Grupo Norte. 

---