top of page

Noia Portus Apostoli B-Castroverde: coa urxencia de seguir gañando na casa

Recibe o Noia Portus Apostoli B ao Castroverde na xornada doce da Preferente Autonómica – Grupo Norte (domingo 1/12, Agustín Mourís) coa obrigación de manterse en perfecta forma como local.


Indicacións durante un adestramento

A saída da semana pasada do Noia Portus Apostoli B convertiuse, unha vez máis, no día da marmota, e xa van cinco consecutivos. Con esa mala costume que os noieses están a coller de non facer os deberes como visitantes, trócase imprescindible cumprir como local, unha materia na que, ata o momento, os de “Juve” non fallaron.


“Gústanos xogar na nosa casa, practicamos un bo fútbol sala e vese un equipo con moita alegría”, afirma Diego “Chaky”, gardameta do cadro filial, que, porén, non dubida en dicir que “a categoría esixe regularidade e cos puntos que obteñamos na casa non nos vai chegar para aspirar aos postos altos”.


E que os noieses son conscientes das súas “carencias” fóra da casa. “Sen dúbida é a nosa tarefa pendente esta temporada”, unha conta pendente que “Chaky” cre que “se conseguimos terminar con esta mala racha a domicilio, estou seguro que vamos a sentirnos máis cómodos fóra do Agustín Mourís e o equipo vai crecer moito”.


Para iso toca deixa atrás partidos como o pasado en Sarria. “Non estivemos para nada acertados, tanto na labor ofensiva como defensiva”, mais o peor sabor de boca quedou en que “a sensación non foi a de que o rival fose superior a nós”, en boa parte porque “os goles que condedemos foron erros nosos máis que méritos do rival”, expresaba Diego.


Nesta nova xornada os noieses recibirán a outro equipo que se sitúa por debaixo deles na clasificación, un Castroverde que con nove puntos parece destinado a loitar pola salvación. Aínda así e visto os exemplos anteriores, cero relaxacións no vestiario branco e toda a concentración posta nun, en palabras de “Chaky”, “partido importante, pos vimos de xogar un mal partido e necesitamos recuperar as boas sensacións”.


Para o porteiro está a ser unha temporada na que compite entre o primeiro equipo e o filial, unha situación na que “me sinto moi cómodo e estou gozando do fútbol sala”. Oxalá os seus afeccionados poidan gozar tamén dunha nova vitoria dos seus este domingo, coa que continuar soñando con facer cousas importantes.

Comentários


bottom of page