CRÓNICA FILIAL | O Portus Apostoli B cae na beira da remontada (5-3)

O cadro filialista noiés igualou un 3-1 en contra, pero nos últimos minutos dúas xogadas desafortunadas acabaron coas esperanzas de sumar algo contra o Concello de Begonte FS.


Cuarta derrota consecutiva para o Noia Portus Apostoli B, que novamente se viu penalizado de forma grave polos seus erros, e aínda así chegou vivo ao tramo final, no que o Concello de Begonte tivo a fortuna e o acerto precisos para levarse os tres puntos.


Desde a defensa buscaba crecer o Portus Apostoli B, nun encontro que comezou igualado e agresivo por parte de ambos bandos. Só dous erros de concentración, un nunha transición e outro nun saque de banda rápido dos locais, decantou a balanza para o Concello de Begonte, que colocaba o 2-0 no marcador.


Reduciu distancias o conxunto branco nunha acción de estratexia, na que Insua anotaba a pase de David Agraso, mais pouco tardou o equipo local en aproveitar un erro en saída de presión dos nosos para facer o 3-1 co que se alcanzou o descanso.


O electrónico mantivo esa situación ata entrados os últimos dez minutos, nos que o Portus Apostoli B deu o seu arreón final. O tanto de Manu Lorenzo e un en propia meta casi consecutivos deron folgos aos noieses, que desgraciadamente acabaron desaparecendo con dúas xogadas desafortunadas. Un tanto en propia meta e outro nun mal despexe terminaron co 5-3 que nin o porteiro-xogador dos nosos puido alterar.


Seguinte partido


Os noieses recibirán ao CD Beade MVMB Copefri a próxima semana, na sétima xornada do campionato ligueiro de Terceira División.


Ficha técnica


Concello de Begonte FS: Jorge Rodríguez (p), Brais Cereijo (c), Jacobo Seijas, Borja Silvosa e Ángel Prado. Tamén xogaron Jose Roca, Brais Ansede, Daniel Jove, Diego Lobeiras, David Fernández, Roberto Freire, Daniel Varela e Francisco Pastor.


Noia Portus Apostoli B: Pablo (p), Insua, Yago Vizoso, Pau e Manu Lorenzo (c). Tamén xogaron Adrián Casaldoeiro, Andrés Buján, Cristian, David Agraso, Pablo López e Álvaro.


Goles: 1-0 Francisco Pastor (8’), 2-0 Daniel Jove (10’), 2-1 Insua (12’), 3-1 Roberto Freire (18’), 3-2 Manu Lorenzo (33’), 3-3 Brais Cereijo en propia meta (33’), 4-3 Yago Vizoso en propia meta (33’), 5-3 David Fernández (35’).


Os colexiados Buján Barciela e Pérez Giráldez amonestaron con cartón amarelo ao xogador local Jacobo Seijas (38’) e ao adestrador David Pena (25’) e aos visitantes Insua (13’), Álvaro (19’) e Pablo López (27’).


Incidencias: partido correspondente á xornada seis do campionato de Terceira División, disputado no Municipal de Baamonde.