Durante cinco días os rapaces inscritos gozaron e aprenderon de fútbol sala, ademais doutras actividades, xunto a varios invitados.

 
A semana pasada quedará como inolvidable para os 65 rapaces anotados ao XII Campus de Verán do Noia Portus Apostoli, que tiveron a oportunidade de gozar entre o luns e o venres, nun horario de 10:00 a 13:30, no Municipal Agustín Mourís e no Pavillón Alonso Rodríguez da vila noiesa, da práctica do fútbol sala xunto aos seus monitores e a algúns invitados.

​Estes foron os xogadores noieses Porto e Palmas; o xogador do Santiago Futsal, Isma; Gael López, seleccionador galego alevín; Carlos Martínez, árbitro galego de Primeira División da LNFS; e Martín López, membro do corpo técnico do Palma Futsal. Ademais do fútbol sala, ao longo da semana tamén tiveron tempo para experimentar outras actividades como o zumba ou o bádminton.

Para pechar esta semana, o venres leváronse a cabo sorteos de produtos de vestiario do Noia Portus Apostoli e doutros aportados polos invitados ao longo do Campus, e como punto e final procedeuse a entregar o diploma conmemorativo de participación a cada un dos rapaces que fixo posible esta XII edición da cita máis especial do verán do club noiés.

Desde o club, moitas grazas a todos os que fixeron posible esta edición, dende os rapaces ata os pais e nais, pasando por monitores e outros membros do club. Para o ano máis!

​Deixámosvos algunhas das fotografías deste XII Campus de Verán!

​Os nosos Alevíns firmaron esta fin de semana pasada unha actuación espectacular no V Torneo Nacional Antonio Suárez, en Marín. Acudían ao torneo invitados polo organizador, o ED Marín, e quedaban encadrados no Grupo B xunto o EFS Salnés, o Movistar Inter e o anfitrión, o ED Marín El Nao.

O factor de xogar tres partidos nun mesmo día non pesou para os nosos Alevíns, capaces de sumar en todos os partidos, derrotando ao EFS Salnés (4-2) e empatando fronte o ED Marín El Nao (3-3) e ante todo un Movistar Inter (2-2), o que lles valeu o acceso aos adestrados por Álex “Petetes” e Pablo López ás semifinais do domingo.

Nelas agardaba o Ancora d’Ouro, ao que derrotaron por 5-1, para culminar o seu camiño a unha final a onde se volverían a ver co Movistar Inter. Os nosos, adestrados o domingo por Diego Pérez, puxéronlles as cousas moi difíciles aos de Torrejón durante todo o partido, pero despois de adiantarse co gol de Eloy, non puideron evitar os dous tantos cos que os interistas lle daban a volta ao marcador e vencían o encontro.

Aínda que unha derrota na final deixe o sabor agridoce, trátase dun resultado marabilloso, un segundo posto ante grandes equipos que deixa patente o bo traballo dos nosos Alevíns, capaces de competir e disfrutar á vez, como demostraron en Marín durante estes dous días. Moi orgullosos de vós!

Severino Barreiro, presidente do Noia Portus Apostoli, Marlon Velasco, adestrador do Noia Portus Apostoli, e Santi Freire, alcalde da vila, foron os encargados de presentar na mañá deste xoves sete de xuño o evento estival por excelencia do club.

Unha edición “especial”, segundo as palabras do presidente, pola presenza de Marlon Velasco como director do Campus, ao que describiu como unha persoa con “grande experiencia neste tipo de eventos”.

O adestrador noiés, despois de dar agradecementos a concello e medios, amosou o seu compromiso e confianza en lograr un Campus no que “nenos e nenas de Noia poidan disfrutar da práctica deportiva en xeral e do Fútbol Sala en particular, nun ambiente lúdico e en compañía doutros mozos” para “familiarizar, desenvolver e perfeccionar os fundamentos técnicos e tácticos deste deporte” e “potenciar as relacións inter persoais e desenvolver valores e hábitos saúdables”.

Ademais, Marlon confirmou a presenza de “xogadores, monitores e entrenadores do propio club, así como visitas de diferentes xogadores profesionais de primeiro nivel que participarán nas actividades de forma activa”.

A conferencia pechouse coa intervención do alcalde de Noia, Santi Freire, que expresou a súa ledicia pola permanencia do primeiro equipo en Segunda División e o seu “orgullo” e “compromiso” a seguir apoiando ao club no futuro en iniciativas como esta.

Información:

O XII Campús de Verán desenvolverase entre o 8 e o 12 de xullo nos polideportivos Municipal Agustín Mourís e Alonso Rodríguez, nos horarios de 10:00 a 13:00 horas.

Cada rapaz e rapaza disporá dun seguro de accidente, ademais dunha bebida e almorzo diario (que incluirá un zume, unha peza de fruta...), e recibirá agasallos como unha mochifesta, unha camiseta oficial do Campus e un diploma certificando a súa participación.

O prezo xeral de inscrición é de 40€, mentres que para os xogadores do Noia Portus Apostoli será de 30€. Para as familias que inscriban a máis dun neno/nena, terán un 50% de desconto nun dos inscritos. E en adición, existirá un desconto de 5€ por pronto pago antes do 25 de xuño.

O último día para realizar a inscrición será o 6 de xullo. Para realizala, poden descargar o tríptico nas canles de comunicación do club (páxina web, Facebook e Twitter).

​

​Non existe mellor maneira de terminar unha temporada que levantando ao ceo un trofeo. Con esa idea chegaron os xuvenís do Noia Portus Apostoli ao Municipal Santa Isabel de Santiago de Compostela, onde lles esperaba a cita máis importante do curso, a final de Copa Local Xuvenil fronte o La Salle A.

Un encontro de altas tensións que comezou cos nosos encaixando primeiro. Un golpe que non sería definitivo para o equipo de Pablo López, que respondeu dándolle a volta ao electrónico con tres tantos do capitán, Iago. Malia acadar esa vantaxe, os rivais conseguiron nivelar de novo o partido, levándoo á prórroga.

Nos momentos decisivos do choque e, por ende, da competición, volveu a aparecer o capitán dos xuvenís noieses para completar o seu póquer de goles e darlle o título aos seus. Despois dos máis de corenta minutos de nervios, tocou celebrar como se debe o conquistado trofeo sobre o parqué de Santa Isabel.

E como agasallo a este triunfo, o próximo domingo os nosos xuvenís terán a oportunidade de levantar a Supercopa. Para facelo, terán que superar ao La Salle B, campións da Liga.

Noraboa, rapaces!

O Noia Portus Apostoli B puxo punto e final á temporada de baleiro, despois de entregar os tres puntos a un Opticalia FS Pontedeume más efectivo nas ocasións que dispuxo. 
Saíron os noieses con Richy baixo paus, Diego, Bruno, Álex “Petetes” e David Agraso, contando no banco de suplentes con Martín Oliveira, Pablo López, Iago, Cristian e Pablo Sixto. Por parte do Opticalia FS Pontedeume os titulares foron Diego Rodríguez en portería, Alejandro Garea, Jose Carlos Carpente, Rubén Rico e Daniel Seijas, saíndo como suplentes Francisco Seijas, Juan Varela e Aarón Rodríguez. 
Dende os minutos iniciais quedou claro que o partido non tería un dono claro. As ocasións sucedíanse en ambos bandos, e no minuto catro Diego Pérez abría o marcador para o Noia Portus Apostoli B. Cedo responderían os visitantes, con Alejandro Garea nivelando no mesmo minuto e Aarón Rodríguez dándolle a volta no cinco. O filial noiés non se viría abaixo, e no seis Cristian convertía o 2-2, o seu primeiro gol coa camiseta branca. 
Despois desta voráxine atacante, as defensas pasarían a tomar a iniciativa, impedindo que o electrónico se movera ata o descanso do encontro. 

Descanso, Noia Portus Apostoli B 2-2 Opticalia FS Pontedeume 

Na segunda metade non tardarían os visitantes en facerse coas rendas do encontro, e no minuto 25 Jose Carlos Carpente poñía por diante aos seus de novo. A vantaxe aumentaría no minuto 31, por medio de Aarón Rodríguez. Apenas segundos despois, Pablo López reducía distancias para colocar o 3-4. 
Cos noieses buscando a remontada nos últimos intres, Iago vestiu a camiseta de porteiro-xogador, pero ás veces tanto arriscar custa caro, e os goles de Juan Varela e Jose Carlos Carpente puxeron a sentencia. 

Final do partido, Noia Portus Apostoli B 3-6 Opticalia FS Pontedeume 

Un curso de altos e baixos, de grandes e malos momentos, no que os nosos se encontraban cunha nova categoría. Finalmente, o Noia Portus Apostoli B finaliza sétimo con 39 puntos nesta Preferente Autonómica – Grupo Norte, co obxectivo sobradamente cumprido e un soño que chegaron a tocar moi lonxe. O ano que vén, con maior experiencia nas súas costas, o filial branco promete dar máis guerra. 

Ficha técnica: 
1-0: 4’ Diego Pérez
1-1: 4’ Alejandro Garea
1-2: 5’ Aarón Rodríguez
2-2: 6’ Cristian
2-3: 25’ Jose Carlos Carpente 2-4: 31’ Aarón Rodríguez 3-4: 31’ Pablo López
3-5: 38’ Juan Varela
3-6: 38’ Jose Carlos Carpente 

Unha longa temporada coloca o seu punto e final para o Noia Portus Apostoli B. Despois dun curso marcado polos distintos altos e baixos de forma, o filial branco rematará o campionato ligueiro fronte á súa afección, recibindo este sábado ao Opticalia FS Pontedeume. 
Os últimos precedentes entre ambos equipos sorrín aos noieses, que venceron a temporada pasada nun intensísimo choque no Agustín Mourís con medio título de Liga en xogo, e fixeron o mesmo na primeira volta deste curso no Municipal A Casqueira de Pontedeume con un contundente 2-7. Moi distintas son as cousas agora, con só os nosos xogándose algo en clave clasificatoria. Deste último partido dependerá se o Noia Portus Apostoli B finaliza sétimo ou oitavo na táboa. 
Iso estará nas mans dos xogadores, entre eles dous cos que falamos na previa deste encontro, como son Manu Lorenzo e Martín Oliveira. O primeiro ve este choque como “unha última oportunidade de competir e de demostrar que se as cousas se tiveran dado doutra forma estariamos loitando por algo máis”, ao mesmo que Martín, que o afronta “con moita ilusión, queremos darlle unha alegría á nosa afección polo apoio que nos deron durante toda a temporada e unha vitoria sería a mellor despedida posible”. 
Unha temporada, como di Martín, “agridoce, a pesar de que conseguimos o obxectivo, que era a permanencia, debido ao baixón que pegamos na segunda volta non conseguimos os resultados que queriamos, pero podemos decir que foi unha boa temporada xa que logramos ese obxectivo e quedamos na metade da táboa”, pola súa parte Manu Lorenzo refírese a ese baixón como “unha posibilidade, que ao quedar en terra de ninguén a intensidade baixe e os equipos con máis en xogo o demostren”. Un curso no que aprender de cara ao futuro, “quédome co bo, pero tamén co malo. Esta experiencia serviunos a todos para darnos conta de que nesta liga calquera lle pode ganar a calquera”, afirma Martín. 
O último rival desta experiencia, o Opticalia FS Pontedeume, chega sen opcións de moverse para ningún lado da clasificación, mais os nosos non se confían. “Nos últimos anos vivimos varios enfrontamentos, e sabemos que non se arrugarán e irán a polo triunfo sen importar a clasificación”, asevera Manu, mentres Martín incide tamén nesa precaución e en manter a concentración para lograr os tres puntos, “debemos ter coidado, son peligrosos e intensos durante os partidos, veuse na ida, onde nos tocou sufrir a pesar de gañar de maneira abultada”. 
Unha última oportunidade para ambos e para o resto do equipo de acabar con boas sensacións persoais a temporada. O de Martín non foi un curso habitual, “non foi a mellor temporada, xa que en novembro deixei o equipo debido a uns problemas, pero isto fíxome reflexionar e darme conta de que me equivoquei, e grazas á confianza do club voltei. Esta foi outra experiencia da que teño 
que aprender”. Pola súa parte, Manu tampouco se amosa contento coa súa actuación, “ao final mantívenme en cifras goleadores similares ás do ano pasado, pero penso que nunca cheguei a coller o ritmo de competición axeitado”. 
A próxima temporada abrirase un novo capítulo, no que Martín e Manu aínda non saben se poderán seguir formando parte do cadro branco. Os estudos xogan un papel importante en ambos casos, “o primeiro é o primeiro, e aínda que me doería e sería o último que faría, este verán haberá que pensar cal é a decisión axeitada”, afirma Manu, similar ás palabras de Martín, “aínda non decidín se seguirei ou non. Encántame o fútbol sala, pero agora é un momento para pensar ben no futuro”. 
Os xogadores do plantel filialista terán o seu último adestramento este xoves, antes de despedir a temporada diante dos seus co Opticalia FS Pontedeume como derradeiro rival. 

A mesma historia de case sempre para o Noia Portus Apostoli B en Agolada. A pesar de levar a iniciativa en grandes tramos do encontro, os erros en ambas áreas custáronlle unha nova derrota aos brancos que pon en risco o seu posto final no campionato ligueiro. 
Por parte do Galitec Agolada actuaron de saída Esteban Martínez en portería, José Mejuto, Ovidio Areán, Pablo Díaz e Ricardo Varela, con Gabriel Silva, Jose Antonio García, Diego Peyret e Javier Gómez como suplentes. Formou o Noia Portus Apostoli B de inicio con Richy baixo paus, Manu García, Bruno, Iago e Álex “Petetes”, participando desde o banco Pablo López, Diego Pérez, Manu Lorenzo e Pablo Sixto. 
Un comezo frío dos noieses propiciou que os locais se aproximaran ata en tres ocasións de forma moi perigosa á portería de Richy. Salváronse os nosos de encaixar gol nesas intentonas do Galitec Agolada, sacando o esférico case da liña de gol, pero ao final no minuto sete o tanto chegaría, de maneira desafortunada para os intereses dos brancos. Un tiro de Ricardo Varela rexeitaba en Richy e introducíase na portería para o 1-0. 
Un minuto tardou en responder o Noia Portus Apostoli B, cunha paralela por banda esquerda que finalizaba Pablo Sixto cun contundente disparo coa esquerda que volvía a nivelar o electrónico. Con este gol chegaron os mellores minutos dos nosos na primeira metade, con Manu Lorenzo dispoñendo da ocasión máis clara, estando a piques de poñer o 1-2, mais o seu tiro impactaría no poste. 
E como quen perdoa termina pagándoas, no minuto 16 os locais tomarían de novo a iniciativa, con Diego Peyret anotando o 2-1 despois dunha xogada na que a defensa noiesa se amosou demasiado branda. Un resultado que non duraría moito, xa que de novo o Noia Portus Apostoli B respondería de inmediato. A presión en primeira liña de Manu Lorenzo propiciaba a perda do último home dos agolenses e o tanto do dorsal nove dos nosos. 
Con este resultado de táboas e dúas ocasións moi claras do Galitec Agolada, chegaba o tempo do recreo no Municipal de Agolada. 

Descanso, Galitec Agolada 2-2 Noia Portus Apostoli B.
​
Como se dundéjà vu se tratara, un novo inconsistente inicio faría moito dano aos intereses do cadro branco. Dúas xogadas desgraciadas para os noieses deixábanlles o terreo costa arriba, xa que José Mejuto non desaproveitaría as súas oportunidades e poñería o 4-2 no minuto 24. 
Non lle quedou outra ao Noia Portus Apostoli B que facerse co control definitivo do esférico, propiciando que os locais deran un paso atrás en defensa. As ocasións dos nosos sucedéronse sen acerto e con frustración, ata que no 29 anotaba de novo Pablo Sixto, aproveitando un balón rexeitado na área rival. 
O 4-3 devolvía as esperanzas, pero como da mesma forma antes respondera inmediatamente o filial, fixérono os locais. Diego Peyret aproveitou unha acción aillada para superar a Richy e colocar o 5- 3. Tan só dous minutos máis tarde, no 32, o mesmo xogador encargaríase de aumentar a vantaxe do Galitec Agolada. 
Este gol provocou a reacción desde o banco noiés, que optou por introducir o xogo de cinco con Iago de porteiro-xogador. Os noieses continuaron acumulando balón e tamén ocasións frustradas, e nun dos balóns que quedou morto Ovidio Areán sentenciaba o encontro co 7-3 que sería definitivo. 

Final do partido, Galitec Agolada 7-3 Noia Portus Apostoli B 

A última saída do curso terminou con final triste para os noieses, que os deixa empatados a 39 puntos co Galitec Agolada, aínda que por diante por mellor diferencia de goles. Agora non queda outra que sumar na última xornada do campionato a próxima fin de semana para asegurar a sétima praza pola que levan loitando os últimos partidos. 
Ficha técnica: 
1-0: 7’ Ricardo Varela 1-1: 8’ Pablo Sixto 2-1: 16’ Diego Peyret 2-2: 17’ Manu Lorenzo 3-2: 23’ José Mejuto 4-2: 24’ José Mejuto 4-3: 29’ Pablo Sixto 5-3: 30’ Diego Peyret 6-3: 32’ Diego Peyret 7-3: 39’ Ovidio Areán 
Os colexiados amosaron un cartón amarelo, ao local José Mejuto (22’). 

A 29a xornada ligueira suporá a última saída do Noia Portus Apostoli B neste curso, que toma unha maior importancia despois do ocorrido no seu último enfrontamento. A derrota na casa fronte o Covirán Quiroga deixa a praza coa que finalizarán os noieses no aire, xa que entre eles, sétimos clasificados, e os oitavos hai tan só tres puntos de distancia. 
E, precisamente, o cadro branco xogará esta fin de semana co equipo que se sitúa nesa oitava posición, o Galitec Agolada FS, que con 36 puntos no seu casilleiro ameaza aos noieses con quitarlle algo que hai semanas parecía asegurado. 
Na primeira volta o choque entre estes dous equipos, disputado no Agustín Mourís, apenas tivo historia, co Noia Portus Apostoli B protagonizando un inicio de partido fulgurante que deixou descolocado aos agolenses e mantivo os tres puntos na vila noiesa (7-3). Porén, a historia nesta ocasión semella distinta, cos nosos atravesando unha situación máis incómoda con respecto á que vivían por esas datas. 
Un punto valeríalles aos brancos para asegurar esa sétima praza, xusto o resultado que colleitaron o ano pasado no Municipal de Agolada, no encontro co que abriron a temporada pasada, na que os noieses alzaron o título ligueiro da Primeira Galicia – A Coruña. Máis dun ano despois, ambos equipos poñen en disputa un botín ben diferente ao que poderían pensar naqueles intres. 
Antes de ir a polos tres puntos este venres ás 19:00 fronte o Galitec Agolada, no definitivo desprazamento do curso, os noieses disfrutarán do último adestramento da semana este xoves. 

Sabor agridoce no Agustín Mourís na tarde do pasado sábado. A pesar dunha segunda metade na que o Noia Portus Apostoli B superou con claridade ao seu rival, os tres puntos voaron da vila noiesa froito duns primeiros vinte minutos para esquecer por parte do cadro branco. 
Saíu de inicio o filial noiés con Richy baixo paus, Manu García, Pablo López, Diego Pérez e Bruno, actuando desde o banco Martín Oliveira, Manu Lorenzo, Jorge Agraso, David Agraso, Álex “Petetes” e Iago. Por parte do Covirán Quiroga, formaron Diego Vázquez, Marcos Fradejas, Pablo Dosouto, Carlos Macía e Alejandro Armesto, xogando como suplentes Andrés Campo, Saúl Fernández e Marcos López. 
Como en todos os partidos, trataba o Noia Portus Apostoli B de impoñer o seu xogo en ataque nos primeiros minutos, pero sufría máis da conta cando entregaba o coiro ao equipo rival, algo que sucedía con moita frecuencia a causa da lenta circulación que dispoñía o cadro branco. Nunha desas xogadas, un tiro de Marcos Fradejas desviado por un noiés convertíase, no minuto 4, no 0-1. 
A apatía e o erro semellaban instalados nos xogadores locais, algo que conseguiron aproveitar os visitantes ata en dúas ocasións consecutivas no minuto oito. Dous erros graves dos noieses contribuíron aos dous goles de Saúl Fernández para colocar o 0-3. 
Seguiron uns minutos nos que os noieses non facían máis que chocar contra eles mesmos ou contra o gardameta rival, que comezou a ter que empregarse a fondo. Porén, o seguinte tanto volvería a levar a firma do Covirán Quiroga, noutro erro de concentración da defensa filial, que deixa a Pablo Dosouto só diante de Richy, que non pode facer nada no un para un. 
O cuarto gol si espertou definitivamente aos locais. Ocasións como as de David Agraso ou o lanzamento ao poste de Manu García demostraban que aos noieses comezaba a cambiarlle a cara, pero terían que convertilo en goles na segunda metade, porque a primeira non daba para máis. 

Descanso, Noia Portus Apostoli B 0-4 Covirán Quiroga FS.
​ 
Dende o primeiro segundo aprezábase que o guión non sería o mesmo. Máis rápida circulación do esférico, maior concentración, máis atrevemento... Só faltaba que o balón entrara na portería rival, empresa pouco sinxela ao longo de toda a temporada para os brancos. Nun tiro de Pablo López, Pablo Dosouto marcaba na súa portería e poñía o 1-4 no minuto 22. 
Tan só un minuto máis tardaron os noieses en poñer o 2-4, cando Pablo López remataba á rede sen miramentos unha deixada de Manu García. O Agustín Mourís, ante a resposta dos seus, recuperou 
os seus ánimos e aumentou o apoio aos xogadores do filial, que aumentaron cando no 26’ Diego Pérez enviaba a gol un balón alto para colocar o 3-4. 
En tan só seis minutos os noieses reducirán a desvantaxe de catro a un gol. Todo facía indicar que a primeira metade quedaría nun mal soño, cando comezou o festival de paradas do porteiro rival, un Diego Vázquez que se fixo enorme ante as intentonas locais. Practicamente todo o plantel noiés puxo polo menos unha vez a proba ao visitante, que se amosou insuperable nos minutos máis importantes. 
E nunha das poucas ocasións que concedeu o Noia Portus Apostoli B ao contragolpe, Saúl Fernández superou por abaixo a Martín Oliveira para poñer, no minuto 33, un 3-5 que deu aire aos de Quiroga. 
Unha decisión que provocou a entrada do xogo de cinco nos noieses, con Iago vestindo a camiseta de porteiro-xogador. Apenas uns segundos despois da súa entrada, o propio Iago completaría unha boa xogada local para devolver a desvantaxe a un gol, con catro minutos por diante. 
Volveu a esperanza pero non a boa puntería ante un porteiro entonado, que mantivo os tres puntos do lado do seu equipo e desesperou a un Noia Portus Apostoli B que se acordou máis que nunca de que se precisa competir os corenta minutos. 

Final do partido, Noia Portus Apostoli B 4-5 Covirán Quiroga FS.

Esta semana os noieses adestrarán como previa á última saída da temporada, que os levará a Agolada, nun partido entre sétimo e oitavo no que, con tres puntos separando a ambos na táboa, o posto estará en xogo. 
Ficha técnica: 
0-1: 4’ Marcos Fradejas 0-2: 8’ Saúl Fernández 0-3: 8’ Saúl Fernández 0-4: 14’ Pablo Dosouto 1-4: 22’ Pablo Dosouto pp 2-4: 23’ Pablo López 
3-4: 26’ Diego Pérez 3-5: 33’ Saúl Fernández 4-5: 36’ Iago 
Os colexiados amosaron cartón amarelo ao local David Agraso (31’) e aos visitantes Marcos López (31’) e Carlos Macía (33’).