Buscar

O filial domina e mira cara arriba (6-4)

Triunfo claro do Noia Portus Apostoli B, que estivo todo o partido por diante dun Jogafan Ordes FS superado en xogo e físico durante os corenta minutos.



No Agustín Mourís o Noia Portus Apostoli B é outro. Diante da súa afección o xogo do filial noiés é máis fluido, as ocasións acaban con maior facilidade en gol e as caras de alegría son máis habituais. O exemplo, o cuarto en catro partidos como local, volveu a facerse presente este pasado domingo.


Dende o mesmo inicio do encontro entre os noieses e o Jogafan Ordes FS, correspondente á oitava xornada da Preferente Autonómica – Grupo Norte, os brancos amosaron as súas intencións de dar un golpe na mesa. Tres minutos e varias oportunidades lles custou derribar a resistencia dos visitantes, que volvería a ser vencida en dúas ocasións máis cando se cumplía o minuto seis de xogo.


Facía dano o Noia Portus Apostoli B á carreira e no ataque posicional, mais nunha xogada de estratexia mal executada os visitantes atoparían un anaco de aire para nun rápido contragolpe poñer o 3-1, no minuto oito.


Aínda así, o control seguía nos dominios locais, que facía intervir ao gardameta ordense con asiduidade. Quizáis lonxe dos seus, os de “Juve” acabarían por frustrarse ante as ocasións falladas e entregarlle opcións aos rivais, pero non no Agustín Mourís.


No minuto quince, un envío á zona de pívot terminaba co 4-1 que ampliaba distancias para os brancos, que aínda terían tempo de aumentar nunha diana máis a súa vantaxe antes do descanso, ao converter un disparo de dez metros.


Descanso, Noia Portus Apostoli B 5-1 Jogafan Ordes FS


Cunha renta suficiente para saír sen apuros pero non sen tensión aos segundos vinte minutos, o Noia Portus Apostoli B mantivo o guión de levar a manixa do partido e as ocasións á portería rival. Porén, o sexto tanto que puxera máis calma na grada noiesa non chegou, algo que si fixo o segundo dos ordenses.


Nunha xogada na que aproveitaron a saída do porteiro local, os vermellos tiraron de picardía para reducir novamente as distancias, esta vez a tres goles, e manter as esperanzas de poder sumar. Unhas que se reduciron de novo cando unha recuperación dos noieses no medio campo propiciou o 6-2 que, a dez minutos do final, aproximaba máis os tres puntos a Noia.


Algo unido a que os ordenses non eran quen de enlazar máis dunha xogada peligrosa que puxera en apretos aos brancos, que entrando nos últimos cinco minutos de encontro mantiñan a vantaxe de catro dianas, que no 35’ se volvería a reducir a tres.


Nun contraataque que pillou á defensa noiesa descolocada, un remate de cabeza no segundo pau poñía o 6-3 e daba lugar a un final interesante entre ambos conxuntos, tendo en conta ademais o alto número de faltas que se amosaba no marcador por parte dos dous equipos, nunha segunda metade na que se mantivo a intensidade.


Nunha polémica xogada e froito dunha controvertida decisión arbitral a dous minutos do final, o Noia Portus Apostoli B quedaba cun xogador menos, o que provocou que os de “Juve” tiveran que defender en inferioridade, ata que a segundos do final un contacto era interpretado como falta polos colexiados, sendo a sexta, que desde os dez metros os ordenses non desaproveitaron para o 6-4 final co que se pechou o partido.


Final do partido, Noia Portus Apostoli B 6-4 Jogafan Ordes FS


Venceu e convenceu o Noia Portus Apostoli B diante dun equipo próximo na clasificación e, sobre todo, diante da súa afección, coa que só sabe gañar, e que siga a racha… dentro de dúas semanas. A próxima, os brancos, agora quintos clasificados con quince puntos -a seis do primeiro posto-, visitarán Cee para verse as caras co FSF Villa de Cee Hotel La Marina, terceiros na táboa con 19 puntos, noutro duelo de importancia na zona noble.