PREVIA 1/4 COPA GALICIA | SD-Pazos de Borbén FS-Noia Portus Apostoli FS | Comeza a defensa do título

O cadro noiés debuta nesta edición da competición autonómica como actual campión visitando aos pacenses, conxunto da Terceira División, este mércores 8 de febreiro a partir das 20:30h.

Choque da eliminatoria de cuartos de final, a partido único, que non dispoñerá de emisión en directo.

Pirata conduce o balón diante de Edu Jabá, nun adestramento (foto: Manuel Lorenzo)

Co parón ligueiro desta semana por motivo da Copa de España, chega o turno da Copa Galicia para o Noia Portus Apostoli FS, que fará o seu debut na competición na que defende título na cancha do SD Pazos de Borbén FS, equipo da Terceira División, este mércores 8 a partir das 20:30h.

O conxunto noiés chega a este partido con ganas de reivindicarse, despois da contundente derrota do pasado sábado en Murcia, que deixou especial mal sabor de boca por como se produciu, ademais de coa ilusión que supón adentrarse nun torneo moi importante para o club e coa tarefa de repetir a conquista do curso anterior.

A ilusión noiesa terá que baterse coa pacense. A poboación do concello da provincia de Pontevedra leva varias semanas agardando a chegada deste encontro, coas entradas esgotadas para apoiar no Municipal de Pazos ao seu equipo, que ocupa a segunda praza na Terceira División con 43 puntos, coa misión de tentar superar a todo un actual oitavo clasificado de Primeira. Para chegar aquí, os vermellos derrotaron ao Carballiño FS (8-4), ao Sala Ourense (5-3) e ao Ganomagoga IES Coruxo FS (2-0).

Como cada temporada, a Copa Galicia presenta a oportunidade de loitar por un estimado título no contexto autonómico, un camiño que o Portus Apostoli xa sabe como se percorre e que, nesta ocasión, comeza con toda a ambición, humildade e respecto do mundo en Pazos de Borbén.